Geçen dynç günleri Türkmenistanyň Ahal welaýatynyň Baherden etrabynyň Garagum sährasynda Milli Bahar baýramy mynasybetli ralli-reýd ýaryşlary geçirildi. Bu barada asmannews.ru internet-sahypasynda bellenilýär.

Türgenler umumy uzynlygy 143 kilometre barabar ýolda Türkmenistanyň kubogyny almak ugrunda bäsleşdiler.

Bu ýaryşa Türkmenistanyň Awtoulag sport federasiýasynyň, Türkmenistanyň Içeri işler ministrliginiň polisiýa bölümleriniň we “Türkmenawtoulaglary” agentliginiň sport awtoulaglary gatnaşdy.

Ýaryş iki tapgyra bölündi: birinjisiniň uzynlygy 33 kilometre, ikinjisi 110 kilometre barabar boldy. Gatnaşyjylar çylşyrymly şertlerde adatdan daşary sürüjilik ukyplaryny görkezmeli boldular.

Bäsleşigiň netijelerine görä Türkmenistanyň Awtoulag sport federasiýasynyň “Nissan Patrol” kysymly awtoulagyň sürüjisi Maksat Daňatarow Türkmenistan kubogyna eýe boldy.

Ikinji orny Daňatarowyň topardaşy Meilis Abdullaýew eýeledi. “Mitsubishi L200” kysymly awtoulagda ýaryşa gatnaşan Ýolaman Abaýew (Türkmenistan Awtoulag sport federasiýasy) üçünji orna mynasyp boldy.